Barnehage

Våre pedagogiske opplegg er lagt til rette for 4–6 åringar. Borna skal ikkje vere passive under eit besøk på Norsk Reiselivsmuseum, men vere aktive i si eiga læring.

Bamse på museum

Fleire bamsar har kome til bygda og gøymt seg i museet. Etter at borna har funne bamsane, får dei høyre om ulike grunnar folk har for å reise. Kvifor har bamsane gøymt seg på museet? Korleis kom dei hit? Kvar kom dei frå?

Skattejakt

Etter ein runde i hovudutstillinga, får borna leite etter skatten. Utsnitts foto av gjenstandar eller montrar gøymer seg i boksar, og fører steg for steg mot mål.

Skuletilbod

Kvifor vart Noreg eit eksotisk reisemål? Norsk reiselivshistorie (alle klassesteg)

Me tek reisa frå dei fyrste turistane sine noko tvilsame erfaringar i møte med norske kulturar, vidare til at utlendingar tok landet i bruk på heilt nye måtar – noko som gav oss merkelappen «Det eksotiske nord». Me ser på endringane turismen har ført med seg – for bønder, for kvinner, for små samfunn og ikkje minst – for sjølvbilete.

Norsk postkorthistorie – korleis skapte me vår identitet før sosiale media overtok? (4.-10. klassesteg)

Visste du at postkort har i periodar hatt hemmelege motiv, og at ulykker vart brukt som motiv – eller at politisk sarkasme presentert ved hjelp av humor – er ein del av postkorthistoria? I dag har sosiale media teke over denne kommunikasjonen, ei kort helsing frå reiser blir sendt frå mobilen.

SoMe – minnebok for vår tid? (8.-10. klassesteg)

Finnast det likskap mellom eit museum sitt samfunnsoppdrag med å ta vare på historia, ta med seg fortid og notid inn i framtida, og alle publikasjonar me dagleg sender ut på nettet? Dei nasjonalromantiske måleria utstilte på galleria i Europa gav Noreg identitet som sjølvstendig nasjon.

Kva hendingar i fortida har forma oss? Korleis vil me i dag forme vårt ettermæle? Kan me kvalitetssikre våre publikasjonar?

Berekraftig reiseliv (8.-10. klassesteg, vgs.)

Korleis kan me ta vare på naturen og samstundes ha nok arbeidsplassar lokalt, langt inn i framtida?

Eit tverrfagleg undervisingstilbod som fokuserer på medansvaret me har lokalt for å kunne gå FN sine berekraftsmål i møte.

Sex-turisme og menneskerett (8.-10. klassesteg, vgs.)

Det viser seg at sex-turisme har stor utbreiing på verdsbasis. Dette er eit emne som det er viktig å snakke om, både i eit globaløkonomisk perspektiv der tilbod frå heile verda er tilgjengeleg, der nokre av oss har råd til å kjøpe medan andre må selje for å overleve.

Me drøftar emna:

·        Kroppspress i sosiale samanhengar og sosiale media

·        Utrydding av fattigdom – FN berekraftsmål

·        Kvinnesyn – FN berekraftsmål, likestilling mellom kjønna

·        Stigmatisering av «kjøpebruder»

·        Seksuelle tenester til funksjonshemma

·        Trafficking – menneskehandel – moderne slaveri

·        Forbod mot likekjønna forhold – LHBT

·        Religion som maktfaktor – fordømming - skam